ചെമ്മലമറ്റം: ഒരു വർഷം മുഴുവൻ മുടങ്ങാതെ വിശുദ്ധ കുർബാനയിൽ പങ്കെടുത്ത വിദ്യാർഥികൾക്ക് മാതൃകാപരമായ ആദരവുമായി ചെമ്മലമറ്റം പന്ത്രണ്ട് ശ്ലീഹന്മാരുടെ പള്ളി. മഴയും മഞ്ഞും ശാരീരിക അസ്വസ്ഥതകളും വകവയ്ക്കാതെ 365 ദിവസവും അൾത്താരയോടു ചേർന്നുനിന്ന് വിശുദ്ധ കുർബാനയിൽ പങ്കെടുത്ത 13 സൺഡേ സ്കൂൾ വിദ്യാർഥികൾക്കാണ് ഇടവക സൈക്കിളുകൾ സമ്മാനമായി നൽകിയത്.
കുട്ടികളിൽ ആത്മീയ അച്ചടക്കവും ദൈവാശ്രയബോധവും വളർത്തുക എന്ന ലക്ഷ്യത്തോടെയാണ് ഈ വേറിട്ട ആദരം സംഘടിപ്പിച്ചത്. അരുവിത്തുറ സെന്റ് ജോർജ് ഫൊറോന വികാരി ഫാ. മാത്യു ചന്ദ്രൻകുന്നേൽ സൈക്കിളുകളുടെ വിതരണോദ്ഘാടനം നിർവഹിച്ചു.
ചടങ്ങിൽ ഇടവക വികാരി ഫാ. സെബാസ്റ്റ്യൻ കൊല്ലംപറമ്പിൽ, ഫാ. ജേക്കബ് കടുതോടിൽ തുടങ്ങിയവർ പങ്കെടുത്തു. കുട്ടികളുടെ ഈ നേട്ടത്തിന് പിന്നിൽ പ്രവർത്തിച്ച മാതാപിതാക്കളെയും സൺഡേ സ്കൂൾ അധ്യാപകരെയും ചടങ്ങിൽ പ്രത്യേകം അഭിനന്ദിച്ചു.
