വിശുദ്ധ കുര്‍ബാനക്കും മറ്റ് തിരുകര്‍മ്മങ്ങള്‍ക്കുമായി നമ്മള്‍ ദേവാലയത്തിലായിരിക്കുമ്പോള്‍ IHS എന്ന മുദ്ര നമ്മുടെ ശ്രദ്ധയില്‍പ്പെട്ടിട്ടുണ്ടാകുമെന്നു ഉറപ്പാണ്. മദ്ബഹയിലെ വിരിയിലും തിരുവോസ്തിയിലും ഈ മൂന്നു അക്ഷരം വ്യക്തമായി നാം കാണുന്നു.
ഒപ്പം ലോകമാകമാനമുള്ള കത്തോലിക്കാ ദേവാലയങ്ങളിലെ ചിത്രകലകളിലും, രൂപങ്ങളിലും IHS എന്ന ചുരുക്കെഴുത്തിനെ നമുക്ക് കാണുവാന്‍ സാധിക്കും. എന്നാല്‍ ഇതിനെക്കുറിച്ച് കൂടുതലായി ആലോചിക്കുവാന്‍ നമ്മില്‍ പലരും ശ്രമിച്ചിട്ടില്ലായെന്നതാണ് സത്യം. ഈ മൂന്ന് അക്ഷരങ്ങള്‍ക്ക് ക്രൈസ്തവരുടെ ഇടയില്‍ വളരെയേറെ പ്രാധാന്യമുണ്ട്.
എന്താണ് IHS ന്റെ ശരിയായ അര്‍ത്ഥം. നമ്മളില്‍ ചിലരെങ്കിലും ധരിച്ചിരുന്നത് പോലെ “I have suffered”, “Jesus Hominum Salvator” (രക്ഷകനായ യേശു), “In Hoc Signo ” (ഈ അടയാളം വഴി നീ വിജയിക്കും) എന്നീ വാചകങ്ങളുടെ ചുരുക്കെഴുത്തല്ല IHS. ഇതിനെ ഒരു ക്രിസ്ത്യന്‍ ചിത്രാക്ഷരമുദ്ര (Christogram) എന്ന് വിളിക്കുന്നതായിരിക്കും കൂടുതല്‍ ശരി. വാസ്തവത്തില്‍ ‘ജീസസ് ക്രൈസ്റ്റ്’ (യേശു ക്രിസ്തു) എന്നെഴുതുവാനുള്ള പഴയകാലത്തെ ഒരു മാര്‍ഗ്ഗമായിരുന്നു IHS.
ഇതിനെക്കുറിച്ച് കൂടുതല്‍ അറിയുവാന്‍ നമുക്ക് മൂന്നാം നൂറ്റാണ്ടിലേക്ക് പോകേണ്ടി വരും. അക്കാലത്തെ ക്രിസ്ത്യാനികള്‍ക്ക്, യേശുവിന്റെ ഗ്രീക്ക് ഭാഷയിലുള്ള പേരിന്റെ ആദ്യ മൂന്നക്ഷരങ്ങള്‍ അവിടുത്തെ ചുരുക്കപ്പേരായി എഴുതുന്ന ഒരു പതിവുണ്ടായിരുന്നു. ഗ്രീക്ക് ഭാഷയില്‍ യേശുവിന്റെ പേര് ΙΗΣΟΥΣ എന്നാണ് എഴുതിയിരുന്നത്. ഇതിന്റെ ആദ്യത്തെ മൂന്നക്ഷരങ്ങള്‍ ΙΗΣ ചേരുമ്പോള്‍ യേശുവിന്റെ ചുരുക്കെഴുത്തായി. അക്കാലത്തു Σ (Sigma) എന്ന ഗ്രീക്ക് അക്ഷരത്തിനു സമമായ ലാറ്റിന്‍ അക്ഷരമാലയിലെ അക്ഷരം S ആയിരുന്നു. ഇപ്രകാരമാണ് IHS എന്നത് യേശുവിന്റെ പേരിന്റെ ചിത്രാക്ഷരമുദ്രയായത്.
എട്ടാം നൂറ്റാണ്ടിലാണ് ഈ വാക്ക് ആദ്യമായി ഉപയോഗിച്ച് കാണുന്നത്. ‘കര്‍ത്താവായ യേശു ക്രിസ്തു രാജാക്കന്‍മാരുടെ രാജാവ്’ എന്നര്‍ത്ഥം വരുന്ന DIN IHS CHS REX REGNANTIUM എന്നതായിരിന്നു ആ വാചകം. റോമന്‍ ചക്രവര്‍ത്തിയായിരുന്ന ജെസ്റ്റീനിയന്‍ രണ്ടാമന്റെ നാണയങ്ങളിലും ഈ മുദ്രയുണ്ടായിരുന്നു. തിരുസഭയുടെ ആദ്യകാലങ്ങളില്‍ തന്നെ ഈ ചിഹ്നം ഉപയോഗിക്കുന്ന പതിവുണ്ടായിരുന്നുവെന്നതും ശ്രദ്ധേയമാണ്.
‘യേശുവിന്റെ നാമം മഹത്വപ്പെടുത്തുക’ എന്ന ലക്ഷ്യത്തോടെ പതിനഞ്ചാം നൂറ്റാണ്ടില്‍ സിയന്നായിലെ വിശുദ്ധ ബെര്‍ണാഡിന്‍ ആരംഭിച്ച പ്രചാരണ പരിപാടിയുടെ ഭാഗമായി തങ്ങളുടെ വീടുകളുടെ വാതിക്കല്‍ IHS എന്നെഴുതിവെക്കുവാന്‍ അദ്ദേഹം ക്രിസ്ത്യാനികളെ പ്രേരിപ്പിച്ചിരിന്നു. 1541-ല്‍ വിശുദ്ധ ഇഗ്നേഷ്യസ് ലയോള ‘ഈശോ സഭ’ (ജെസ്യൂട്ട്) എന്നറിയപ്പെടുന്ന താന്‍ സ്ഥാപിച്ച പുതിയ സന്യാസ സഭയുടെ മുദ്രയായി IHS-നെ സ്വീകരിച്ചു.
കാലക്രമേണ ഈ അടയാളം ക്രൈസ്തവ ലോകത്തിന്റെ പ്രസിദ്ധമായ പ്രതീകങ്ങളില്‍ ഒന്നായി മാറി. ചുരുക്കത്തില്‍ യേശുവിന്റെ വിശുദ്ധ നാമത്തെ കുറിക്കുന്നതാണ് ഈ ചിത്രാക്ഷരമുദ്ര. ഇനി IHS എന്ന പ്രതീകം നാം കാണുമ്പോള്‍ ചിന്തിക്കേണ്ടത് പ്രധാനമായും ഒരു കാര്യമാണ്. ‘ആകാശത്തിന് കീഴെ മനുഷ്യ രക്ഷയ്ക്കായി യേശുനാമം അല്ലാതെ മറ്റൊരു നാമവും നല്‍കപ്പെട്ടിട്ടില്ല’ എന്ന വചനവാക്യമായിരിക്കണം നമ്മുടെ മനസ്സില്‍ വരേണ്ടത്.
നമുക്ക് പ്രാർത്ഥിക്കാം…
“എന്റെ മക്കളേ, ധൈര്യമായിരിക്കുവിന്‍. ദൈവത്തെ വിളിച്ചപേക്ഷിക്കുവിന്‍. ഇതു നിങ്ങളുടെ മേല്‍ വരുത്തിയ അവിടുന്ന് നിങ്ങളെ സ്മരിക്കും. ദൈവത്തില്‍ നിന്ന് അകലാന്‍ കാണിച്ചതിന്റെ പത്തിരട്ടി തീക്ഷ്ണതയോടെ തിരിച്ചുവന്ന് അവിടുത്തെ തേടുവിന്‍. (ബാറൂക്ക് 4:26:27)” കാരുണ്യവാനായ കര്‍ത്താവെ ഈ പ്രഭാതത്തില്‍ സഹനം അനുഭവിക്കുന്ന എല്ലാ മനുഷ്യരെയും അങ്ങയുടെ കരങ്ങളില്‍ സമര്‍പ്പിക്കുന്നു. ജീവിത യാത്രയില്‍ ഞങ്ങള്‍ക്ക് കടന്നു വന്നിരിക്കുന്ന വേദനകളെ അങ്ങയുടെ മുന്‍പില്‍ ഞങ്ങള്‍ കാഴ്ച വയ്ക്കുന്നു.
ഓ ദിവ്യ നാഥാ, താങ്ങുവാന്‍ ആകാത്ത ഒരു സഹനവും അങ്ങ് ഞങ്ങള്‍ക്ക് നല്കരുതേ. ഗദ് സെമന്‍ തോട്ടത്തില്‍ അങ്ങ് പ്രാര്‍ത്ഥിച്ചത്‌ പോലെ ഞങ്ങളുടെ ഹിതമല്ല അങ്ങയുടെ ഹിതം നിറവേറുവാന്‍ പ്രാര്‍ത്ഥിക്കുവാന്‍ ഞങ്ങള്‍ക്ക് കൃപ നല്കണമേ. മാലഖമാരുടെ സംരക്ഷണം ഞങ്ങള്‍ക്ക് നല്കണമേ. കര്‍ത്താവെ, ഓരോ ദിനത്തിലും ഞങ്ങളുടെ കഷ്ടപാടുകള്‍ അങ്ങ് കാണുന്നല്ലോ. ഞങ്ങളുടെ സഹനങ്ങള്‍ അനുഗ്രഹങ്ങള്‍ ആക്കി മാറ്റണമേ. ജീവിതത്തില്‍ സംഭവിച്ച അനര്‍ത്ഥങ്ങള്‍ കാരണം ആരെങ്കിലും അങ്ങയില്‍ നിന്നും അകന്നു പോയി പാപത്തിന്‍റെ മേഖലകളില്‍ ചരിക്കാന്‍ ഇട വന്നിട്ടുണ്ട് എങ്കില്‍ ദൈവമേ നീ അവരെ സ്പര്‍ശിക്കണമേ, ആശ്വസിപ്പിച്ചു തിരികെ കൊണ്ട് വരണമേ.
പിതാവായ ദൈവമേ ഇന്നേ ദിവസം ഞങ്ങളുടെ ആകുലതകളെ അങ്ങയുടെ സന്നിധിയില്‍ സമര്‍പ്പിക്കുന്നു. ജോലിയെ കുറിച്ചുള്ള ഭാരങ്ങള്‍, മക്കളെ കുറിച്ചുള അസ്വസ്ഥതകള്‍, സാമ്പത്തിക പ്രശ്നങ്ങള്‍, കുഞ്ഞുങ്ങള്‍ ഇല്ലാത്ത അവസ്ഥ, വിവാഹം നടക്കാത്ത അവസ്ഥ എല്ലാം അങ്ങയുടെ സന്നിധിയില്‍ സമര്‍പ്പിക്കുന്നു. കര്‍ത്താവെ കരുണ ആയിരിക്കണമേ. ദൈവമേ അവിടുന്ന് ഇസ്രേയല്‍ ജനത്തെ മരുഭൂമിയില്‍ സംരക്ഷിച്ചത് പോലെ ഞങ്ങളുടെ സഹനത്തിന്റെ കാലയളവില്‍ വലിയ സംരക്ഷണം നല്കണമേ, ആമേന്‍.