കടുത്ത പ്രതിഷേധങ്ങൾ മൂലം നിർത്തിവച്ചിരുന്ന ‘കക്കുകളി’ എന്ന നാടകം വീണ്ടും അരങ്ങിലെത്തിച്ചുകൊണ്ട് ഞങ്ങൾ സന്യസ്തരെയും ഞങ്ങൾ അനുവർത്തിച്ചുവരുന്ന ജീവിതരീതിയെയും നിഷ്കരുണം അവഹേളിക്കാൻ മടികാണിക്കാത്ത ചിലർ രംഗപ്രവേശം ചെയ്തിരിക്കുന്നത് അപലപനീയമാണ്.
ഞങ്ങളുടെ സന്യാസ ജീവിതത്തെക്കുറിച്ച് പൊതുസമൂഹത്തിൽ തെറ്റിദ്ധാരണകൾ ഉളവാക്കുന്ന വിധത്തിലുള്ള ആശയങ്ങളാണ് നാടകത്തിലൂടെ അവതരിപ്പിക്കപ്പെട്ടിരുന്നത്. ക്രൈസ്തവ സാന്നിധ്യമില്ലാത്ത കേരളത്തിന്റെ വിവിധ ഭാഗങ്ങളിൽ അവതരണങ്ങൾ നടത്തിയ പ്രസ്തുത നാടകത്തിനെതിരെ കേരളമെമ്പാടും കേരളസഭയിലെ വിവിധ സംഘടനകളുടെ നേതൃത്വത്തിൽ വലിയ പ്രതിഷേധങ്ങൾ അരങ്ങേറുകയുണ്ടായി.
അതിന്റെ ഫലമായി നാടകത്തിന്റെ അവതരണം അവസാനിപ്പിക്കുവാൻ ആലപ്പുഴ പറവൂർ പബ്ലിക് ലൈബ്രറിയുടെ ഭാഗമായ നൈതൽ നാടകസംഘം തീരുമാനിച്ചിരുന്നു. എന്നാൽ, ആവിഷ്കാര സ്വാതന്ത്ര്യത്തിന്റെ പേര് പറഞ്ഞ് ചില രാഷ്ട്രീയ പാർട്ടികളുടെ പിൻബലമുള്ള സംഘടനകളും വ്യക്തികളും മുൻകയ്യെടുത്തുകൊണ്ട് ഈ നാടകം വീണ്ടും അരങ്ങിലെത്തിക്കുന്നു എന്ന് അറിയുന്നു.
അഭിമാനബോധത്തോടെ ജീവിക്കാനുള്ള ഞങ്ങളുടെ അവകാശത്തിന് മേലുള്ള കടന്നുകയറ്റമാകരുത് നിങ്ങൾ വിഭാവനം ചെയ്യുന്ന ആവിഷ്കാര സ്വാതന്ത്ര്യം എന്ന തിരിച്ചറിവ് ഉണ്ടാകണമെന്ന് ആ കലാകാരന്മാരെ പ്രത്യേകം ഓർമ്മിപ്പിക്കുന്നു. ഞങ്ങൾ പവിത്രമായി കാണുന്ന സന്യാസജീവിതത്തെക്കുറിച്ചുള്ള തെറ്റായ ധാരണകൾ ഈ സമൂഹത്തിന്റെ പൊതുബോധത്തിൽ ഉറപ്പിക്കാനാണ് നിങ്ങളുടെ ശ്രമമെങ്കിൽ അതിനെ ഒറ്റക്കെട്ടായി ഞങ്ങൾ പ്രതിരോധിക്കുകയും നിയമപരമായ നടപടികൾ സ്വീകരിക്കുകയും ചെയ്യും.
ഇന്ത്യയിൽ വിവിധ ഭാഗങ്ങളിൽ പീഡിപ്പിക്കപ്പെടുന്ന ക്രൈസ്തവരോട് അനുഭാവം പ്രകടിപ്പിക്കുന്നു എന്ന് അവകാശപ്പെടുന്ന രാഷ്ട്രീയപ്പാർട്ടികളുടെ വിവിധ പോഷക സംഘടനകൾ വഴിയായി നടത്തുന്ന ഇത്തരം അവഹേളനങ്ങളും ക്രൈസ്തവ പീഡനം തന്നെയാണ് എന്നുള്ളതും ഞങ്ങൾ നിങ്ങളെ ഓർമ്മിപ്പിക്കുന്നു. ഇതരസം നീക്കങ്ങളിൽനിന്നും എല്ലാവരും പിന്തിരിയണമെന്നും പരസ്പര ആദരവോടെയും സഹകരണത്തോടെയും മുന്നോട്ടുപോകണമെന്നും ഞങ്ങൾ അഭ്യർത്ഥിക്കുന്നു.
By, വോയ്‌സ് ഓഫ് നൺസ് -എക്സിക്യൂട്ടീവ് കമ്മിറ്റി.
“കളികൾ” കളിക്കാൻ വേണ്ടി മാത്രം ഉള്ളതാണ്. പക്ഷെ ജീവിതം വച്ചു കളിക്കുന്നത് അപകടം ആണ്. ജീവിതം ജീവിക്കാനുള്ളതാണ്. അന്തസ്സോടെ അവനവൻ ജീവിക്കുകയും സ്വന്തം ജീവിതം കൊണ്ട് മറ്റുള്ളവരുടെ ജീവിതങ്ങളുടെ അന്തസ്സ് കൂടി ഉയർത്താൻ പരിശ്രമിക്കുകയും ചെയ്യുന്നവരാണ് കളികൾക്കും മുകളിൽ ജീവിതത്തെയും വ്യക്തികളെയും ബഹുമാനിക്കാൻ അറിയാവുന്നവർ.
അപരന്റെ കണ്ണിൽ കുത്തി അവന്റെ കാഴ്ച കളയുന്നവനും, അപരന്റെ അഭിമാനത്തിന് ക്ഷതമേൽപ്പിക്കാൻ സ്വന്തം കഴിവിനെ ഉപയോഗിക്കുകയും ചെയ്യുന്നവനെക്കാൾ ഹീനനായി ആരുണ്ട്. കലയെ വിശുദ്ധവും അഭിമാനവുമായി കാണുന്ന ഒരു വിഭാഗത്തിന്റെ തന്നെ നാണക്കേട് ആയി വീണ്ടും അവർ കൊഞ്ഞനം കുത്താൻ ഒരുങ്ങുന്നു.
നിങ്ങൾ കളിച്ചുകൊണ്ടേ ഇരിക്കുക… ഞങ്ങൾ ജീവിച്ചു കൊണ്ടേ.. ഇരിക്കും..
റാണി മരിയ എന്ന സന്യാസിനിയെപ്പോലെ, മുഖമില്ലാത്തവരുടെ മുഖവും, ശബ്ദം ഇല്ലാത്തവരുടെ ശബ്ദവുമായി…
സ്നേഹപൂർവ്വം
Sr. Adv. Josia SD.