വത്തിക്കാന്‍ സിറ്റി: തന്റെ കാലിലെ ബുദ്ധിമുട്ട് ഭേദമായിട്ടില്ലെന്നും, നടക്കരുതെന്ന് ഡോക്ടര്‍ നിര്‍ദ്ദേശിച്ചിരിക്കുകയാണെന്നും ഫ്രാന്‍സിസ് പാപ്പ. ഇക്കഴിഞ്ഞ ഏപ്രില്‍ 30ന് സ്ലോവാക്യയില്‍ നിന്നുള്ള കത്തോലിക്ക തീര്‍ത്ഥാടകരെ അഭിസംബോധന ചെയ്ത് സംസാരിക്കുകയായിരുന്നു പാപ്പ.
“ഒരു പ്രശ്നമുണ്ട്: ഈ കാലിന് പറ്റുന്നില്ല, എന്നോടു നടക്കരുതെന്നാണ് ഡോക്ടര്‍ പറഞ്ഞിരിക്കുന്നത്. നടക്കാന്‍ എനിക്കു ആഗ്രഹമുണ്ട്. പക്ഷേ ഇത്തവണ എനിക്ക് ഡോക്ടര്‍ പറഞ്ഞത് അനുസരിക്കേണ്ടി വരും” വത്തിക്കാനിലെ പോള്‍ ആറാമന്‍ ഹാളില്‍ വെച്ച് നടന്ന കൂടിക്കാഴ്ചക്കിടെ പാപ്പ പറഞ്ഞു.
ഫ്രാന്‍സിസ് പാപ്പയുടെ കാല്‍മുട്ടിലെ സന്ധിവീക്കം കാരണം നടക്കുമ്പോഴെല്ലാം പാപ്പക്ക് കാലില്‍ ശക്തമായ വേദന അനുഭവപ്പെടുന്നുണ്ടെന്ന് റിപ്പോര്‍ട്ടുണ്ടായിരിന്നു. കഴിഞ്ഞ കുറേ ആഴ്ചകളായി തന്റെ കൂടിക്കാഴ്ചകള്‍ പാപ്പ ഒഴിവാക്കി വരികയാണ്. പൊതു അഭിസംബോധനകളും, വിശുദ്ധ കുര്‍ബാനകളിലും ഭൂരിഭാഗം സമയവും പാപ്പ ഇരിക്കുകയാണ് ചെയ്യുന്നത്. ശനിയാഴ്ച നടന്ന കൂടിക്കാഴ്ചക്ക് പരസഹായം കൂടാതെയാണ് പാപ്പ നടന്നെത്തിയതെങ്കിലും, ഭൂരിഭാഗം സമയവും പാപ്പ ഇരിക്കുകയായിരുന്നു. അവസാന ആശീര്‍വാദത്തിന് മാത്രമാണ് പാപ്പ എഴുന്നേറ്റത്.
2021 സെപ്റ്റംബറിലെ സ്ലോവാക്യ സന്ദര്‍ശനം തന്റെ ഹൃദയത്തില്‍ ഉണ്ടെന്നു സ്ലോവാക്യ സന്ദര്‍ശിച്ചതിനു തനിക്ക് നന്ദി പറയുവാനെത്തിയ ആയിരക്കണക്കിനു സ്ലോവാക്യന്‍ തീര്‍ത്ഥാടകരോടായി പാപ്പ പറഞ്ഞു.
പാശ്ചാത്യ – പൗരസ്ത്യ ക്രൈസ്തവ ലോകത്തെ തമ്മില്‍ ബന്ധിപ്പിക്കുന്ന ഒരു പാലമായി വര്‍ത്തിച്ചുകൊണ്ട്, ആചാര-പാരമ്പര്യ സമ്പുഷ്ടതയില്‍ ജീവിക്കുന്ന സ്ലോവാക്യന്‍ സഭയെ കാണുമ്പോള്‍ സന്തോഷമുണ്ടെന്നും, കൊറോണ പകര്‍ച്ചവ്യാധിക്കിടയിലും സ്ലോവാക്യ സന്ദര്‍ശിക്കുവാന്‍ കഴിഞ്ഞതിന് ദൈവത്തോട് നന്ദി പറയുകയാണെന്നും പാപ്പ പറഞ്ഞു. യുക്രൈ ന് ജനതയോട് കാണിക്കുന്ന ആതിഥ്യമര്യാദയുടെ പേരിലും പാപ്പ സ്ലോവാക്യന്‍ ജനതക്ക് നന്ദി അറിയിച്ചു.
അതിനിടയിൽ ഫ്രാൻസിസ് പാപ്പയുടെ കാലിലെ ബുദ്ധിമുട്ട് വ്യക്തമാക്കുന്ന വീഡിയോ പുറത്ത് വന്നു. പാപ്പയ്ക്കു വേണ്ടി നമ്മുക്ക് പ്രത്യേകം പ്രാർത്ഥിക്കാംകാൽമുട്ടിലെ ലിഗ്മെന്റിലെ പ്രശ്നങ്ങളെ തുടർന്ന് ഫ്രാൻസിസ് പാപ്പ നേരിടുന്ന ആരോഗ്യ പ്രശ്നങ്ങൾ വ്യക്തമാക്കുന്ന പുതിയ വീഡിയോ പുറത്ത് വന്നു. ഇന്നലെ മെയ് 04 ബുധനാഴ്ച വത്തിക്കാനിൽ സെന്റ് പീറ്റേഴ്സ് ചത്വരത്തിൽ നടത്തിയ പ്രഭാഷണത്തിന് ശേഷം പാപ്പ ഏറെ ബുദ്ധിമുട്ടിയാണ് എഴുന്നേൽക്കാൻ ശ്രമിച്ചത്.
മാർപാപ്പ പരസഹായത്തോടെ എഴുന്നേൽക്കാൻ ശ്രമം നടത്തുമ്പോൾ ആയിരക്കണക്കിന് തീർത്ഥാടകർ അദ്ദേഹത്തെ കൈയടിച്ചും ആർപ്പുവിളിച്ചും പ്രോത്‌സാഹനം നൽകി. പാപ്പ നേരിടുന്ന ആരോഗ്യ പ്രതിസന്ധി വ്യക്തമാക്കുന്നതാണ് വീഡിയോ.
കാലിന് പറ്റുന്നില്ലായെന്നും നടക്കരുതെന്നാണ് ഡോക്ടര്‍ പറഞ്ഞിരിക്കുന്നതെന്നും നടക്കാന്‍ ആഗ്രഹമുണ്ടെങ്കിലും പക്ഷേ ഇത്തവണ ഡോക്ടര്‍ പറഞ്ഞത് അനുസരിക്കേണ്ടി വരുമെന്നും പാപ്പ കഴിഞ്ഞ ദിവസം പറഞ്ഞിരുന്നു. പത്രോസിന്റെ പിൻഗാമി, ലോകത്തിന്റെ പ്രിയപ്പെട്ട ഇടയൻ ഫ്രാൻസിസ് മാർപാപ്പയ്ക്ക് വേണ്ടി നമ്മുക്ക് പ്രത്യേകം പ്രാർത്ഥിക്കാം.